政情：助養童3年竟冇變樣 宣明會發舊相惹議
唔少貧窮地區嘅兒童得唔到溫飽，亦缺乏返學學習嘅機會，有熱心市民會透過機構助養兒童，希望幫佢哋改善生活。但日前有捐助非洲埃塞俄比亞兒童嘅助養人發現，香港宣明會每年寄出嘅助養兒童照片多次重複，甚至出現「逆生長」情況，事主質疑被騙，而香港世界宣明會就話已向埃塞俄比亞辦事處跟進事件。
網民劉小姐前日喺社交平台貼文，稱每年都會睇一次助養兒童嘅相，但望一眼就唔會拎番出嚟睇。點知日前佢一拎出嚟睇嘅時候，竟然發現助養兒童16同17歲嘅照片係一樣嘅，去到2018年該名兒童望落去好似大個咗好多，但到2019年又突然由一個青少年變番做一個小朋友，完全唔係同一個人嚟。
網民：我係咪畀人呃咗好耐
最誇張嘅係，該兒童2021年同2018年嘅照片係一樣，連兒童着緊嘅衫、背景嘅樹木，以及連睇緊嘅書都係同一版 ，反問「本書睇咗3年都未睇完？」劉小姐形容宣明會係本世紀最大詐騙集團，又質疑「我係咪畀人呃咗好耐？」貼文隨即引起網民熱議。
香港世界宣明會回應傳媒，話2019年嘅兒童進度報告就由宣明會埃塞俄比亞辦事處直接寄出嘅，香港辦事處已就以上兩點，向埃塞俄比亞辦事處跟進助養兒童嘅近照同情況。