中環出更：多食住家飯 陳勇笑言抗疫式肥胖
新冠肺炎疫情已經爆發逾一年，或許一年嚟大家嘅生活模式都有唔少改變，唔知又有冇抗疫疲勞呢？新界社團聯會社會服務基金執行董事陳勇就話自己一年嚟肚腩大咗唔少，形容係「抗疫式肥胖」。究竟點解疫情下會發福不少呢？
疫情下少咗社交飯局，應該食少咗先係o架。陳勇話偏偏相反，佢以前去飯局如果食唔晒咪唔食走囉，但依家多咗留喺屋企，太太同小朋友食唔晒嘅嘢都會畀晒佢食，仲會提醒佢唔好浪費，日復一日咪食得愈嚟愈多囉！佢又話社交距離關係令好多會議要分幾次進行，對住唔同嘅人講同一番說話，佢講笑話有巡迴演唱會嘅感覺添呀！不過，佢話留意到有啲與會者喺視像會議結束後都仲未離開會議室，證明咗相關人士根本就無留心開會啦，所以更加珍惜面對面嘅討論。
陳振彬籲改視像拜年
九龍社團聯會會長陳振彬形容疫情好似過山車咁，大家一開始都對病毒嘅認識唔深，一年嚟上咗寶貴嘅一課。佢又覺得香港市民冇得頂，抗疫自覺性高，大部分市民都肯戴口罩。不過，如果真係想將疫情遏下來，佢就呼籲大家農曆新年期間唔好去街喇，改為網上視像拜年，或者拍條祝賀嘅短片傳畀親戚朋友，將視像拜年變成一種潮流。
講到疫情一年最難忘嘅回憶，香港島各界社會服務基金會主席蘇長榮就話，舊年初疫情啱啱開始時鬧口罩荒，抗疫物資處處斷貨，但慶幸嘅係社會各界都千方百計咁全球搜羅口罩，今時今日口罩供應充足，真係好難想像番當時短缺嘅情況，一路走來不勝感嘆。佢又話好多義工都願意去疫廈派發抗疫物資，即使無酬勞都任勞任怨，令佢非常感動。
卓妮