政情：將軍澳建發電場唔益街坊 區議員鬧爆
全港最大嘅太陽能發電場，將會坐落於將軍澳堆填區！西貢區議員張美雄就話既然太陽能發電場喺將軍澳興建，政府係咪應該以電費回贈嘅方式，惠及當區居民呢？但政府就好似聽唔入耳喇！佢就鬧爆政府意見接受、態度照舊喎。
倡電費回贈惠及居民
張美雄喺社交平台上載影片，講述將軍澳堆填區正進行復修工程，但過渡期間會有土地沉降、釋出有害氣體嘅問題，暫時唔可以興建任何康樂設施。之不過，喺咁廣闊、空曠嘅人造斜坡上面，就可以興建太陽能發電場嘞！而城市規劃委員會最近就通過申請，將會喺堆填區南面興建4,000塊太陽能光伏板，附近仲會建變壓站同觀景台添！
聽落好似唔錯喎，既然太陽能發電場喺將軍澳興建，會唔會益吓街坊呢？張美雄就希望政府將賣電嘅收益，以電費回贈嘅方式惠及當區居民，但政府聽完就冇乜反應喎。佢批評政府永遠都係意見接受、態度照舊，仲話建議就提咗畀政府喇，都冇乜其他辦法咁話呀！