政情：田二少點名鬧爆 許正宇揼波鐘 議員冇時間質詢

喺最近嘅立法會內務委員會上，都有唔少議員批評官員表現，其中就有議員鬧爆官員回應口頭質詢時遊花園，搞到議員冇得追問。

面對議員嘅批評，內務委員會主席李慧琼亦都有向政務司司長張建宗反映，尋日李就引述張話已經明確提醒班主要官員，指立法會質詢時間係官員同議員就唔同議題溝通嘅重要機會，所以官員喺回應時就必須精準同埋簡潔。至於過往班議員批評官員準備文件時不足，張就提醒官員，提交畀立法會嘅文件嘅內容必須要充實同埋清楚表達重點。

一條問題答足廿幾分鐘

田二少聞言就話喺日前嘅立法會大會，許正宇喺有關電子支付嘅口頭質詢上答咗廿幾分鐘，搞到只有兩至三個議員可以問問題，第4個就問唔到，希望李慧琼可以再同張建宗講吓。

佢唔止鬧爆許回應太多，仲提到港府曾經講過香港嘅創科發展生機勃勃，依家仲係黃金時間，但電子支付喺一河之隔嘅深圳就已經通行，但香港嘅街市仲仍然以濕「立立」嘅銀紙做交易，搞到啲病毒傳來傳去，難怪控制唔到疫情，搞咁耐都搞唔好。佢仲話依家雖然有資助計劃可以畀街市檔戶轉用八達通做交易，但批評政府喺推行時力度不足，建議應該要改變策略，舉例話如果街市檔戶唔肯用電子支付就冇得續約。

港府抗疫表現續受批評

唔單止鬧電子支付嘅問題，多名議員亦繼續批評政府嘅抗疫表現，其中議員陳沛然話依家香港唔少地區十幾廿日都冇新冠肺炎確診個案，亦質疑點解政府可以放寬市民人頭湧湧咁行花市，但港隊球員就冇得練習，關注可唔可以放寬球場同酒吧。議員鄭松泰亦話香港有好多地區都係零確診個案，質疑點解政府唔放寬，直斥政府冇邏輯可言，希望有個跨局嘅小組去研究。

其實班議員都唔係第一日鬧班官嘅表現差，但班官就重複犯錯，真係鬧少啲都唔得。