中環出更：公私營合作興建模式 議員憂現業權操作爭議
立法會財務委員會尋日表決通過喺灣仔加路連山道嘅用地興建地區康健中心，涉款逾1.6億元。雖然議案獲通過，但有議員提到現時公私營合作的模式有問題，質疑點解政府仍要用依種方式興建，擔心日後有爭議。另會上亦通過涉款逾7億元嘅地下雨水渠修復工程，相關工程涉及12個地區，共長約19公里。
對於康健中心採用公私營合作，議員梁志祥認為政府今次畀人覺得有種「就手」嘅感覺，亦關注日後的保養問題。議員周浩鼎就話未來政府興建康健中心時會以同一方式興建，擔心到時會出現業權同埋操作爭議。
質疑為何仍向財會申撥
醫學界議員陳沛然認為發展模式有問題，指依家有老人院同社區設施係以公私營合作，但當中出現問題，例如唔知入口喺邊，又話政府以混合模式畀私人發展商賣地，質疑點解仍要向財務委員會申請撥款，「點解要嚟財委會攞錢打地基，乜唔係人哋幫你起咩？」
建築署總建築師（管理統籌分處2）葉青雲解釋，喺地契條款內曾列明各項要求，包括要求發展商需要喺設計過程中向政府遞交圖則，政府屆時有機會表達意見。佢又話如果出現工程超支，將由承建商承擔。
財經事務及庫務局常任秘書長（庫務）劉焱就解釋，政府有多種發展模式，亦會將設施造價納入賣地成本，今次政府當局則選擇在批地前委託發展商協助興建指定設施，所以與地價唔會對沖。卓妮