政情：接街坊求助竟搵對手幫 陳梓維被斥無能
處理地區事務向來都係區議員嘅恒常工作，之但係自上任以嚟就備受關注嘅油尖旺區議員陳梓維，日前接獲一宗居民求助，但佢就以冇相關大廈嘅立案法團電話為由，「用咗一種冇人會用嘅方法」去處理，就係通知其對手幫忙，搞到對方都話區議員要搵前區議員作個案轉介係第一次。陳梓維似乎以為呢個方法好聰明，但係就惹來網民批評佢能力有問題，仲要「通知對家當做咗」。
貼相防邀功 自以為聰明
事緣陳尋日凌晨喺Facebook上載一張貼喺某大廈內嘅業主立案法團會議記錄，而會議地點竟然係該區前區議員葉傲冬嘅辦事處。陳喺貼文中解釋，話收到街坊投訴指大廈外牆有大幅不明污漬，擔心係糞渠滲漏造成，之不過佢「咁啱冇該法團電話」，所以就通知葉傲冬，仲話「為咗慎防對家將投訴當成自己工作，所以在此立下證據」喎。葉傲冬隨後就喺Facebook回應，籲陳請放心，事關自己「做到都冇諗過抽佢水」，希望陳對得住「糧支」，又指歡迎佢繼續轉介個案。
貼文一出隨即引嚟網民炮轟，斥事件與政治立場無關，而係能力問題。亦有人認為陳作為區議員應更主動聯絡當區民政事務處通知相關部門處理，更批評佢今次發文如「射波嘅最好證據」，亦有唔少建制派人士轉載貼文食「花生」，離島區前區議員傅曉琳都暗諷話佢「勁」，難怪自己連任唔到。睇怕陳梓維要再落力啲做嘢，唔係嘅話遲早引起地區民怨大爆發啊！