喺疫情之下，免費嘅防疫物資本來應該係好搶手，但據政府遞交立法會嘅文件顯示，由舊年5月開始派發嘅「銅芯抗疫口罩」，目前嘅庫存量竟高達約45萬個！其實「銅芯抗疫口罩」舊年首輪派發，疫情第2波已趨緩和；去到第3同第4波疫情爆發，市面上嘅口罩供應已經相當充裕，款式繁多且售價回落，外觀似底褲嘅「銅芯抗疫口罩」就算送到上門，都會被市民打入冷宮。依家剩番咁多「銅芯抗疫口罩」冇人吼，創新及科技局局長薛永恒要點樣處理至好呢？大拿拿數以億元嘅公帑嚟（口架）！
