有傳聞指歐洲某博物館為紀念對抗新冠疫情，要求港府借出自家研發嘅電子追蹤手環嚟做展覽，創新及科技局局長薛永恒就沾沾自喜咁認為，電子手環好成功，先至會引起其他國家嘅關注。不過薛「賣花讚花香」完冇耐就爆出消息，指有台灣返港人士嘅電子手環多次未能啟動「居安抗疫」流動應用程式，隨即就有網民踢爆話，外國只係當電子手環係「古老石山」，先會放入博物館做展覽，又建議加埋銅芯抗疫口罩做展品，就更能彰顯港府抗疫無能咁話。
