政情：公民講場：劉利群捉鼠得啖笑 民間智慧仲高招

第4波疫情大爆發，確診數字高企不下，政府叫市民加強個人衞生，但就完全忽略環境衞生，喺聖誕節嗰幾日唔少地方，尤其係後巷都現鼠蹤，可謂係群鼠亂舞。老實講，食環署喺過去幾年一直被市民狂轟滅鼠不力，鬧完捉老鼠方法落後，跟住又話用高科技，例如紅外線等等，點知都係捉唔到，反而民間智慧仲高招，用一個膠桶就捉到老鼠嘞，反映食環署用緊嘅都係廢招。依家鼠患一年比一年嚴重，署長劉利群咪放鬆手腳唔做嘢喎。