政情：騙徒頻冒認區會主席發短訊
網上騙案猖獗，近日有唔少區議員更成為「騙徒」呀！繼葵青區議會主席單仲偕（(先刂)雞）早前被冒認之後，東區區議會主席黎志強同北區區議會主席羅庭德都出現同樣情況喎。
黎志強同羅庭德尋晚分別喺Facebook貼文澄清事件，同埋提醒大家唔好中計。黎喺貼文話近日出現多宗假冒各區區議會正副主席電話WhatsApp聯絡他人的情況，請各位提高警覺，慎防受騙。而羅庭德都喺Fb話多區區議會主席都被冒認，仲周圍發WhatsApp畀同事，佢提醒各位街坊小心添呀！
邀人11點嚟辦公室
其實細心啲睇，騙徒使用嘅手法係一樣嘅，黎志強同羅庭德都被冒認，仲要講埋同一句嘢，話「聽日11點有冇時間？過嚟我office，有啲事同你傾」。唔知騙徒有咩嘢咁重要，要兜口兜面同議員討論呢？