中環出更：區議員報復民政處 威脅拖延請人撥款

不滿拒供開會場地

灣仔區議員梁柏堅喺Fb貼文，不滿民政處以疫情為由喺1月6日之前都唔會提供開會場地同秘書服務。佢就話先唔討論當局係咪打壓區議會喇，但就提到今次會議其中一項議程，就係關於下一年度由區議會撥款聘請合約員工，協助民政處執行區議會服務，涉款200萬元。

佢笑言處方要請人做嘢都夠膽死唔嚟開會，仲話：「咁呢份討論文件咪唔好討論囉，其他活動撥款就算唔開會，我哋都可以電郵傳閱討論通過，但你呢份嘢慢慢等吓啦。」

而撥款及常務委員會就如期喺下晝兩點半開會，但開咗唔夠45分鐘就因法定人數不足而要休會，最後去到3點半仲係唔夠人，最終主席羅偉珊無奈要宣布流會。

灣仔民政事務處回覆話，由於尋日嘅會議未及討論相關申請文件，民政處將會同該委員會主席商討，根據區議會常規以傳閱方式處理。卓妮