中環出更：兩臨市局時間囊出土 簡松年嘆區會今非昔比
臨時區域市政局及臨時市政局早於1999年12月26日，喺荔枝角公園埋下「文物時間囊」，尋日終於出土！時任臨時區域市政局副主席簡松年（Tony）話，依家演變成嘅區議會並無實權，無論係文娛康樂，抑或係環境衞生都大不如前，唔同以前市政局年代，可以自己話事，更貼地氣、更有效率咁服務市民啊。
Tony回想當年將年報放入時間囊，可以喺出土時，重新思考當年做嘅工作對社會有咩幫助。佢認為市政局年代時，做事效率好高，佢記得有次喺電台聽到有跨境司機分享，當時文錦渡周圍都冇洗手間，人有三急都唔知點算，於是市政局第二朝就設置咗十幾個流動廁所。不過，對於冇獲通知今日開土，Tony直言「離晒譜」，係咪唔記得咗一班「舊人」，仲話如果知道，一定會抽時間去見證。
周潔冰嘆選區太細代表性低
前臨時市政局議員、灣仔前區議員周潔冰（冰姐）專程去見證開土，同時勾起唔少回憶喎。話說全港唯一一座水上船廟「三角天后廟」，一直停泊喺銅鑼灣避風塘，經過爭取多年，政府終於應承喺陸上建廟。而冰姐當年為船廟影咗張相，放入時間囊，同時得知爭取船廟「上岸」嘅目標，終於完夢，形容好有成功感，亦感慨萬分啊。之不過，冰姐對政府殺局感到可惜，話市政局當年選區較大，代表多數民意，但如今嘅區議會分得太細，形容「有時一條邨有好幾個區議員」，令人感覺代表嘅民意零碎。
康文署早前話喺尋日朝早9點掘出時間囊，但之後改口，話為免人流聚集，決定暫時唔打開時間囊，但尋日下晝又突然有工作人員到場挖掘，用咗將近3個鐘，成功取出時間囊。深水埗區議員李俊晞（Joshua）形容喺度「守株待兔」，事關佢朝早9點開始等開土，但佢仍然覺得好值得，話喺市政局年代，佢只係一個小學生，今次可以趁機了解一下當年歷史。佢希望日後舉辦嘅展覽，可以原汁原味咁展示時間囊嘅物品，比較香港多年嚟嘅變化。卓妮