政情：點名斥陳肇始失職 梁美芬倡參考內地防疫
議員梁美芬日前喺社交平台拍片，談論政府推出第4輪防疫抗疫基金。佢認為恢復經濟無疑係相當迫切，但財政赤字係有史以嚟最高，政府有責任做到收支平衡，佢特別點名批評食物及衞生局局長陳肇始要為無法控制疫情、檢疫地方不足負上責任。
促政府採取果斷措施
雖然梁美芬同意派錢救命，但佢認為基金並唔係長遠嘅辦法，建議政府應該由源頭出發，強制要求全民檢測，配合即將到港嘅疫苗，達到清零嘅效果。然而，梁美芬話特區政府拒絕參考內地防控政策，係導致疫情嚴峻嘅原因，認為香港要學習內地應對疫情，採取果斷措施，例如嚟緊半年要積極做好疫苗同全民強制檢測工作，防疫政策唔好再拖拖拉拉。
梁美芬又話，好多自僱人士，譬如公關、製片、地產代理無法受惠於先前嘅3輪基金，希望政府可以將佢哋納入第4輪防疫抗疫基金嘅受助人士之列。