政情：羅致光期票亂開 打工仔無盡等待

羅致光話，疫情下「今年成個世界都唔一樣」，香港唔單止同全球各地一齊面對前所未有嘅疫情挑戰，更經歷政治同經濟嘅內外衝擊，以致民生大受影響。佢話，政府已推出歷來最大規模，合計超過3,000億元嘅連串紓困措施，另一方面將繼續推展各項已承諾嘅利民政策項目，期望出年環球疫情盡快消退，經濟復甦，畀市民生活回復正常。

跟住羅致光就話喺新一年，佢同勞福局、社署、勞工處、以及職學處同事們會繼續全力以赴，跟進多項有長遠裨益嘅工作，包括取消「強積金對沖」嘅立法草擬；擴闊及優化兩元交通優惠；逐步增加法定假日日數嘅立法工作咁話。

優化兩元乘車又再押後

不過翻查資料，羅致光大半年前曾經「實牙實齒」話會維持今年年底向立法會提交取消強積金對沖嘅修訂法例，時間表未有改變，又話按照目前情況，最快要去到2021年年中先至完成立法，亦要等「積金易」平台建立至可以工作，相信措施要到2023或24年先至能夠實施，但勞工處早前承認，取消強積金對沖安排涉及唔同嘅政策範疇同複雜事宜，隨住現屆立法會延任一年，因此計劃向下一屆立法會提交取消強積金對沖修訂條例草案，意味最快都要出年10月提交，最少延遲一年。

至於兩元乘車優惠門檻下調至60至64歲，羅致光早前話目標喺出年年底前實施，但去到今個月月中又改口，話有關計劃將會喺2021至2022財政年度內逐步落實，表明唔可能喺出年7月前完成。

增法定假日陷膠着狀態

對於逐步增加俗稱「勞工假」嘅法定假日，早前政府話希望可趕及2021年內提交予立法會審議，然後喺2022年落實首個新增嘅法定假日，以期2030年將法定假日日數與公眾假期日數看齊。不過前提係，須先通過勞顧會討論，之後再諮詢立法會人力事務委員會嘅意見，政府先至草擬賦權法例。問題係勞顧會就增加法定假日嘅討論陷於膠着狀態，勞資雙方幾時能夠達成共識實屬疑問，更遑論何時立法。咁就難怪會引起外界質疑當局有「走數」嘅可能啦。