中環出更：派一萬泥牛入海 邵家輝倡發消費券
疫情重創本港經濟。立法會振興香港經濟事宜小組委員會尋日舉行首次會議，有議員批評政府早前向市民派發一萬蚊嘅效果有限，建議應該改為派發消費券，以促進本地消費。
議員邵家輝指政府早前向市民派發一萬蚊，但佢留意到唔少市民只係將款項放喺銀行戶口，並冇多加使用，對促進本地消費嘅效果相對有限。而佢就建議政府向市民派發消費券，可以分10期，每星期向市民派發價值500蚊嘅消費券。
議員促處理「乜色經濟圈」
議員林健鋒就話，振興經濟要有新思維，批評政府內部過去經常出現各自為政嘅情況。議員盧偉國就關注，若果本港疫情再唔受控，根本無辦法同內地恢復通關，一切都只係淪為空話。而議員黃定光就重提有人大搞「乜色經濟圈」，認為政府有必要處理。
今次會議亦選出委員會正副主席，其中議員吳永嘉同姚思榮分別喺無對手下，自動當選為正、副主席。卓妮