中環出更：4大專生關顧長者 創遙距監察身體系統
雖然疫情顛覆港人固有嘅生活常態，但憑靈活嘅頭腦，應該可以解決好多問題。創新科技署舉辦第一屆城市創科大挑戰，主題為「智創香港新常態」。針對長者喺疫下深居簡出，同外界缺少聯繫，出席活動啟動禮嘅香港專業教育學院電腦及電子工程高級文憑學生張海鈴，就聯同3位同學共同設計同研發一套名為「Watching U」嘅智能監察系統，可以喺保持社交距離嘅情況下，外界都可以得知長者嘅身體狀況。
張海鈴話呢個監察系統嘅構思，係嚟自佢患有肺病嘅嫲嫲。由於嫲嫲係獨居長者，日常起居飲食需要他人照顧，於是就設計一個能夠喺保持社交距離嘅情況下，仍可了解嫲嫲嘅身體狀況嘅系統，咁就有助於調配藥物，而遇到突發事件，亦可即時提供協助。張解釋系統之所以能夠遙距監察長者身體狀況，有賴運用物聯網、大數據等技術，以及配合智能手錶、智能眼鏡同手機應用程式共同使用，期望產品未來加入體溫監測功能。
黃克強：港年輕人創科表現佳
曾奪海外大專創科比賽獎項、香港中文大學工程學院「工無不克」機械人團隊代表林振霆話，作為開發者不但要解決同改善問題，亦要避免製造問題。但舊年團隊曾經為研發機械人有爭拗，後來隊友透過不斷磨合，最終成功勝出比賽。
香港科技園行政總裁黃克強（Albert）話，每個人都有潛力成為創新者，造福社群，而創新科技生態圈需要每位市民共同參與。至於香港年輕人喺科技方面都有唔錯嘅表現，譬如喺機械人大賽奪得佳績，期待透過全民參與今次活動，解決香港比較貼身嘅問題，科技園會為參賽者提供支援同培訓。Albert又認為香港有能力搞好創科，目前有400幾間公司創業，對大環境培養人才相當關鍵，亦希望年輕人思考一下，其實創科亦係一條唔錯嘅出路。卓妮