中環出更：天氣轉凍 沈慧林三機一氈出動
踏入2020年最後一個月，最近呢個星期天氣明顯凍咗好多，最緊要着多件衫保暖。全港各區工商聯青年企業家聯合會創會主席沈慧林（William）就有法寶，就係「三機一氈」。三機分別係空氣清新機、暖氣機同濕氣機，而一氈就係暖氈喇！佢話買暖氈係因為囡囡唔肯着襪，擔心囡囡對腳凍親。
囡囡唔肯着襪，William就啱啱相反，冬天喺屋企都一定要着襪，否則會凍到瞓唔着。佢又話本身有鼻敏感，所以需要空氣清新機淨化空氣，咁冬天凍起上嚟要開暖氣，但開得多空氣又會乾燥，咪要買埋濕氣機囉！佢又話疫情之後少咗出去食飯，好彩同爸爸住樓上樓下，可以成日一家人喺屋企煮飯食，自家煮食健康啲少啲味精，抵抗力都自然好啲啦！
冬天要保暖，家居電器好幫到手。博愛醫院前主席陳李妮就話浴室裝咗浴室寶，調節溫度，咁樣沖涼時除衫着衫就唔會冷親。佢平時出街又會袋定件外套，以防日頭夜晚溫差大，可以畀小朋友即刻保暖。去到冬天，李妮話會煲多啲魚湯，有營養高之餘，小朋友都好鍾意飲o架。
陳黎惠蓮愛飲蜜糖水潤喉
電器之外，衣着同食物對冬日禦寒都好重要o架！保良局副主席陳黎惠蓮話踏入秋冬，佢無時無刻都會帶定件披肩喺身，隨時隨地都保到暖。飲食方面，佢就鍾意沖蜜糖水嚟飲，滋潤下喉嚨嘛！佢又自爆一日三餐都要有飯落肚，因為已經習慣咗，加上冬天容易肚餓，所以一定要食飽，食完飯成個人都會暖啲o架！
卓妮