政情：做白老鼠 房屋事務委員會線上開會
因應爆發第4波疫情，立法會研究用線上會議軟件Zoom召開「非正式會議」，首當其衝嘅係房屋事務委員會。對於做白老鼠，委員會副主席柯創盛（柯仔）話輪候公屋津貼等項目具時效性希望照開會，又「提醒」運輸及房屋局局長陳帆唔好歎慢板。
話急市民所急 想盡快通過項目
各個事務委員會主席可以考慮採用Zoom開會，房屋事務委員會就決定星期四舉行非正式會議，聽取陳帆就《施政報告》作出簡報。會議涉及過渡性房屋項目嘅資助計劃，以及為輪候公屋超過三年嘅人士提供現金津貼。柯仔話呢啲事項牽涉基層市民利益，市民都等咗好耐。經過評估後，認為要「急市民所急」，繼續舉行會議，期望盡快通過項目。柯仔寄語陳帆做完Zoom會議，都要縮短其他程序，唔好等到下年7月先發放有關現金津貼。
另外，交通事務委員會亦會喺星期五用Zoom開會。但都有唔少事務委員會嘅政策簡報會唔用Zoom開會反而選擇改期，嚟緊呢個星期就至少有5個，包括福利、經濟發展、人力事務委員會等。至於「與預防及控制疾病相關的附屬法例小組委員會」都同樣要延期啊。