中環出更：長毛阿牛當街煲煙 違口罩令罰$5000
由前日開始，有關違反「禁聚令」、「口罩令」同埋不遵從「強制檢測令」嘅定額罰款提高至5,000元。就喺措施實行嘅翌日，就有讀者報料話立法會前議員梁國雄（長毛），同埋東區區議員曾健成（阿牛）尋日就明知故犯，除口罩喺街食煙，仲要畀警員捉到正，隨即對兩人發出定額罰款通知書。
警方回覆查詢話，警員巡經長沙灣英華街時，發現兩名男子喺該處吸煙而未有妥善佩戴口罩，涉嫌違反《預防及控制疾病（佩戴口罩）規例》（第599I章），遂向該名64歲姓曾、同64歲姓梁嘅本地男子發出定額罰款通知書。
事實上，本港吸煙率近年不跌反升，政府早前引述統計數據話，習慣每日食煙嘅人士每日平均吸食12.7支煙。按番呢個數量計算，如果長毛日日「斷正」，每日最少都要交幾萬蚊罰款喎。
長毛疑曾吸煙致立會辦公室起火
之不過，長毛因為食煙而「賴嘢」都已經唔係第一次喇！早喺2013年，佢就被自己友影到疑似喺立法會辦公室食煙，之後有控煙辦人員到佢嘅辦公室派發禁煙宣傳單張。幾個月後，長毛嘅辦公室仲離奇起火，唔少人都懷疑同佢食煙有關。雖然佢當時否認，但今次「斷正」就冇得唔認喇！
卓妮