中環出更：做人如跑馬拉松 張樹槐：堅持到底才會成功
要成為成功嘅領袖，首要嘅條件係乜嘢？人稱「水哥」嘅香港管理專業協會可持續發展委員會委員張樹槐（Walter）認為，成功領袖最大嘅敵人就係自己。
點解？水哥話因為對手會進步，自己唔進步嘅話，嚴格嚟講其實係落後咗，所以要不斷進步、不斷學習，仲要不斷去冒險，佢仲話返工、做人同做運動都係一樣，千祈唔好輕易放棄。佢嘅喜好係跑馬拉松，並以此為例，話開頭練習嘅時候，跑咗冇幾耐會覺得攰同頂唔順，但當你話畀自己聽呢種攰係虛假嘅，繼續不斷去跑，假以時日就可以跑完一個42公里嘅馬拉松嘞！
水哥憶起以前做記者時，成日要搵資料寫稿，其中有次搵唔到需要嘅資料同編輯講，對方話接受唔到佢話做唔到嚟做理由，之後繼續搵資料，最尾又畀佢搵到。佢覺得編輯提醒咗佢做嘢唔能夠輕易放棄，堅持到底一定會成功。
香港社會創投基金創辦人及行政總裁魏華星話呢十幾年識咗一班社會創新者，覺得以前商業模式只係用嚟賺錢，但原來呢十幾年用緊唔同嘅商業模式，好似光房咁，透過一種社會房屋嘅方法，將有需要嘅街坊聯合有心嘅業主，都可以成為一種商業模式，點樣用商業模式達成社會使命係佢呢十幾年收穫最大嘅事。
魏華星：以生意達成社會使命
魏又話做生意唔講使命感會被淘汰，只係將原本資本主義只講金錢、回報同投資回報率作為唯一指標，到今日將使命、理想結合一齊可以相得益彰。
香港城市大學副校長（行政）李惠光認為要成為領袖，就要先搵到自己喜愛嘅事物，並且要不斷追求進步同卓越。佢建議大家每晚臨瞓前問自己兩個問題，每日學到有價值嘅地方同為自己所屬嘅機構、屋企同社會做咗乜嘢貢獻，如果對嗰日嘅答案有不滿，第日就要加倍努力，如果覺得滿意就要提高要求。
卓妮