政情：立會可線上開會 只限無投票會議
疫情肆虐，唔少機構都改為透過網絡開會，就連立法會都有意倣效，研究使用線上會議軟件Zoom開會嘅可行性。尋日立法會主席梁君彥就話打算用Zoom召開「非正式會議」，即係唔使投票表決嘅會，仲話會由各個事務委員會主席考慮，如果有需要用Zoom，就需要3日前通知立法會秘書處。
衞生事務委員會沿用會議室
尋日立法會開咗個簡介會，向議員介紹點樣用Zoom開會。梁君彥喺會後提到，話有部分喺事務委員會召開嘅《施政報告》政策簡報會，因為疫情而需要延期，話如果議員同意，未來可以用Zoom召開呢類會議。唔少人都關注如果轉用Zoom，議員發言是否依舊受到《立法會（權力及特權）條例》嘅保障。梁君彥就解釋，話非正式會議唔受《議事規則》同埋《特權法》保障，又指立法會法律顧問正就此研究，毋須修改《議事規則》。
有份出席簡介會嘅衞生事務委員會主席葛珮帆，話計劃喺下周三早上召開特別會議，討論防疫措施同埋疫苗供應事宜，傾向喺立法會內召開。但佢又話如果疫情轉趨嚴峻，就會用Zoom開會，但由於唔可以進行投票，一旦用Zoom開會就唔會畀議員提出議案喇。