政情：葵青區會商抗疫 鬧爆政府拖後腿
葵青區議會原定尋日朝早10點召開社區事務委員會，惟前日下晝4點先收到當區民政事務處通知，唔會提供開會場地同秘書服務。多名區議員尋日舉行記者會，不滿民政處阻撓區議會處理疫情，例如表明若再採購口罩，當局唔會就款項發還開支。佢哋就形容，「議員要抗疫、政府拖後腿」，呼籲有關當局應該同區議會合作抗疫。
想用300萬買口罩不獲批
身兼防禦肺炎工作小組主席嘅梁靜珊就話，委員會原定會處理約600萬元撥款建議，包括用約300萬元購買口罩等防疫物品畀居民；但民政處早前就話，物流署已有大量口罩，提醒唔會再就區議會買口罩發還開支喎。佢批評，當局至今未有派發口罩，同時阻撓區議會準備防疫物資，令疫情重災區、佢所屬嘅葵盛西邨選區居民得唔到支援。至於社區事務委員會會議，改為下晝2點半喺區議員辦事處召開，3名建制派曾短暫現身。
民政事務總署回應查詢，指若開會時合乎法定人數，會議會被視作有效，處方亦會就會上通過事項作跟進；又指政府庫存口罩成本較低，處方已取得逾500萬個口罩，將計劃向學校及公屋戶等派發。