中環出更：零售業難捱 余鵬春憂裁員潮殺埋身
香港受疫情纏繞將近一年仍未見曙光，加上政府嘅保就業計劃又唔會再延續，導致本已陷入寒冬嘅經濟環境，雪上加霜。日前一班不同界別嘅人士，就係一個網上高峰論壇聚埋一齊抒發意見，席間仲有人擔心零售業嘅裁員潮危機會殺到埋身添。
本身經營國貨公司嘅香港中華總商會常務會董余鵬春就話，作為商界好心急，期望巿況盡快回復正常，因為疫情嚴重打擊巿民嘅消費意欲，又指好多零售商喺過去嘅一段日子，生意額都跌到唔清唔楚，加上實施逾半年嘅保就業計劃告一段落之後，以佢所知，包括自己盤生意在內，好多經營零售嘅公司都計緊數點樣平衡開支，擔心裁員潮嘅厄運，業界難以避免。
葉慶寧斥政府「睇人嚟蝦」
同場嘅旅行社東主協會會長葉慶寧（Freddy）就鬧爆政府係「睇人嚟蝦」，雖然佢好多謝政府早前有向業界提供支援，但後來就話長貧難顧，要佢哋自己諗辦法。Freddy又話業界其實都好配合政府嘅抗疫政策。但近日疫情反覆，政府通知都冇聲，本地一天遊話停就停，搞到業界失晒預算，完全冇諗過旅遊從業員嘅生計咁話。
Freddy依家最希望就係確診數字「清零」，明年一月可以粵港兩地通關，咁樣業界先容易啲企番起身，佢又期望有權力制訂政策嘅人要用腦，否則只會令市民無所適從。
至於人稱「藍爺」嘅民政事務局前局長藍鴻震就直指，公務員向來都有個弊病，就係盡量唔「孭飛」，而某個層面嘅領導更有卸責之嫌。佢覺得呢個正係本港疫情遲遲收唔到科嘅主因，認為佢哋應該放膽去推更為果斷強硬嘅控疫措施，又話國內同新加坡等地嘅抗疫手段都好有成效，值得香港官員借鑑。
卓妮