中環出更：口罩令加辣冇用 田北辰斥冇人執法
因應第4波疫情來襲，政府又再將防疫措施收緊之餘，仲決定將違反禁聚令、口罩令等強制性措施嘅定額罰款倍增。不過議員田北辰就發現仲有好多人冇戴口罩而又冇人執法，批評政府就算增加罰款去到5萬蚊都冇用啦！
田北辰尋日喺社交平台發布短片，指疫情以嚟大家每日都戴口罩，佢自從戴口罩後呢大半年嚟都無試過傷風，所以非常認同口罩嘅防禦力。對於政府近日規定任何人喺公眾地方或者公共交通工具都必須戴上口罩，而定額罰款更增加至5千元，田北辰就對政府今次嘅決定有保留喇。佢指出依家仍然有人，尤其係外籍人士都冇戴口罩行街，認為簡直係當香港法例冇到啊！早前網上更流傳有亞博嘅病人唔戴口罩聚集傾偈嘅相片，但就冇人執法囉。
指樣樣政策慢半拍
田強調口罩對防疫真係好重要o架，即使政府提高咗罰款，都要認真執法先有用o架！所以佢一再呼籲執法部門唔好疏於執法，要畀市民睇到成效。有網民留言表示認同，批評政府做嘢「慢半拍」，加辣口罩令罰款都要等幾日先生效，形容係「樣樣救命嘅政策都例遲，後知後覺！下下都係要等到失晒控先嚟立法」。
卓妮