中環出更：肥彭回魂撐黃之鋒周庭 被斥貓哭老鼠假慈悲
末代港督彭定康（肥彭）又回魂，對香港事務指指點點，出言力撐被判監嘅前香港眾志秘書長黃之鋒、主席林朗彥同成員周庭，話事件顯示中央意圖箝制香港，呼籲各國議員團結一致表態。「23萬監察」發言人王國興批評肥彭貓哭老鼠假慈悲，係佢有份一手送3人入監倉。
黃之鋒、林朗彥同周庭因去年6月21日包圍灣仔警察總部事件，被控煽惑、組織及參與未經批准集結等罪，尋日被判監7至13個半月。肥彭就指3人係爭取民主同法治嘅抗爭人士，形容事件係一個冷冰冰嘅例子，顯示中央政府有意將香港「用手銬鎖上」。肥彭又呼籲各國議員應團結一致，一齊表態支持3人。
王國興話喺過去一年嘅反修例暴亂中，擺明係由外國政府牽頭，喺幕後指揮、組織同出資。而暴徒係勾結外國勢力，進行港版顏色革命，3人被判監係罪有應得。王批評肥彭之流係「精人出口」，3人就「笨人出手」，肥彭繼而再出言評論事件係「貓哭老鼠假慈悲」，想刷存在感。
政界轟幕後黑手 送3人入獄
王國興認為事件顯示國際政治好無恥，真正送3人入獄嘅，正正係彭定康同特朗普呢班人，成為幕後黑手推動年輕人犯罪，令佢哋虛耗青春。而事後彭定康仍然出口，係想畀其他人虛假希望，鼓勵更多人犯事。
卓妮