有指政府擬為染疫巿民發放津貼。惟中咗招都有錢攞嘅消息一出，售賣染疫人士唾液以圖利嘅訊息迅速喺網絡盛傳，亦有輿論斥此舉等如鼓勵巿民染疫，就連傳染病學專家都話，向確診者派錢只會帶來反效果。面對坊間一致負評，作為獻計者嘅行政會議成員黃國健，就反指政府喺「跳舞群組」爆發期間發放消息係「揀錯時機」，又指自己只係建議政府要向強制檢測群組提供津貼，不過構思未成熟就同相關官員提出建議，咁做法同蠶蟲軍師，又有乜分別呢？
