原定喺今日開展嘅港星兩地「旅遊氣泡」，計劃因本港出現第四波疫情而宣布押後，業務陷於冰封狀態嘅旅遊業界都大表失望，旅行社東主協會會長葉慶寧擔心今次臨門一腳泡湯，會引發連鎖效應，影響本港同其他地區商討「旅遊氣泡」互通嘅安排。雖然旅遊業議會主席黃進達認為現階段需以抗疫為先，不過政府抗疫將近一年，政策進退失據，限制措施時寬時緊，莫講話感染個案難以「清零」，就連有病徵人士都可以通街走，抗疫咁多甩漏，旅遊業要復甦，都唔知要等到幾時啦！
