政情：不滿冇拉票爭取支持 葉劉批運房局大安旨意
民間不時有聲音指建制派議員係橡皮圖章，唔知政府係咪都有同樣想法呢？事關早前運輸及房屋局向立法會提交議案，議員葉劉淑儀批評官員欠缺民意觸覺，兼且不滿局方懶得拉票，大安旨意咁以為一定暢通無阻咁獲得通過。
要求局方補交書面補充
最近運房局喺立法會房屋事務委員會上，提交屯門中及元朗錦田南公營房屋發展工程嘅計劃。葉劉之後喺社交平台發布短片，形容局方慘遭滑鐵盧，批評運房局副局長蘇偉文同政治助理符傳富大安旨意，冇做好拉票工作，起碼就冇搵過佢本人喇。
葉劉狠批政府計劃放多4萬名市民入屯門同元朗南，然而長久以來無論東鐵定西鐵都非常擠塞，喺多名議員追問下，官員都答唔到相關嘅交通安排，結果委員會主席話喺局方提交唔到確實回覆前，多數政黨都無法支持計劃，要求局方盡快補交書面補充，做番好功課啊。
而運房局另一項建議，就係為推行過渡性房屋而開設一個年薪高達200萬元嘅額外職位。葉劉就直言官員應該提升民意觸覺，依家經濟欠佳一邊話要慳錢，一邊又開位，令公務員體系持續膨脹，冇可能每推行一件新事物，就要開多一個位。睇嚟葉劉真係好嬲，仲反問「你話呢個局做得好唔好喇？又唔嚟同我哋打招呼」添啊。