中環出更：為考童軍章去觀星 林超英變天文專家

林超英（右）參與童軍活動從而影響畢生志向。旁係童軍總會副香港總監麥偉明。

卓妮早前參與香港童軍110周年活動開展禮，身為童軍總會青少年活動委員會主席嘅林超英都有出席。林參加童軍活動係喺中學時代，當時佢見到同學嘅童軍制服布滿各式徽章，自問唔知要用幾耐時間先可以考到「周身刀」，喺「虛榮心」驅使下，索性就主攻其他人冇嘅專科徽章啦，鑑於當時成個西區都冇人擁有天文章，於是佢就自學成才，不時前往維園呢個情侶嘅會面勝地，喺人哋拍拖嗰陣，佢就專心觀星，從此萌起對天文嘅興趣，後來更成為佢嘅事業，任職天文台仲晉升為台長添。

羅璇與男性競爭唔輸蝕

童軍活動唔少得要「上山下海」，童軍總會署理助理香港總監（內地事務）羅璇（Laura）話，作為女性絕對唔會輸蝕，行山嗰陣或者會覺得自己行唔到上去山頂，但同男性競爭之下反而會激起鬥志。Laura有一對龍鳳胎，長期耳濡目染之下，自小已經參與童軍，Laura同仔女相處完全無隔膜，因為大家擁有共同興趣，又鍾意戶外活動，童軍生活令佢有更多親子活動嘅機會。

羅璇（右）同童軍總會助理香港總監（公共關係）何蘭生（左）都話，童軍活動可以同學校教育相輔相成。（陳嘉順攝）

劉彥樑（左）同童軍總會副會長吳亞明（右）都認為，童軍活動須與時並進。

同場仲有童軍總會香港總監劉彥樑（Joseph），講到童軍發展雖有相當嘅歲月，但去到今日仍未顯得過氣，反而近年有愈嚟愈多人加入童軍o架。不過Joseph話童軍總會都要跟隨時代步伐、變得「貼地」啲，迎合時下青少年嘅喜好先得。近一年嘅疫情，好多童軍活動都要取消，不過Joseph話總會本着「童軍勇敢不怕難」嘅精神，轉為舉辦網上集會、訓練班等，較過往一直舉行嘅面對面活動，似乎更受歡迎添。卓妮