政情：民主派真空期 李國麟憂政治失衡

政府虛應質詢 議會失監察能力

李國麟話民主派議員當中唔少係地方直選議員，反映大部分嘅民意，但喺總辭後就冇人反映民意，亦睇唔到建制派喺議會內可擔當過往民主派監察議會嘅角色。他舉例指自己原本喺上周三大會上提出關於醫院管理局工業行動嘅口頭質詢，但因缺席會議，改由建制派議員代為提出。佢當日有留意直播，直斥政府當日「冇答過嘢」，建制派嘅追問同民主派議員嘅方向截然不同，明顯反映議會失去監察能力。

佢認為過往議會比較理性同互相尊重，當時嘅議員都希望喺制度下作出制衡同監察嘅工作，但依家破壞性氣氛較濃厚，議會制度被破壞，議會猶如「打泥漿摔角」。佢話政治上得到平衡係好重要，如果只有一面倒嘅聲音，變相出現唔公平，佢亦唔想見到咁嘅情況。佢又話議會內從未出現只得建制派嘅情況，形容係「真空期」，雖然唔能夠預計日後嘅情況，但認為係一個好機會，畀市民睇清楚議會內冇民主派嘅情況係點。

即使李離任在即，仍有責任跟進業界事情，不能因為政府不按常理處事就放棄不做，佢計劃喺離任前去信食物及衞生局局長陳肇始，提醒政府仍要跟進業界嘅需求。