政情：路署1683萬升官大計 議員攔路勢阻到底
受到反修例激烈衝突同新冠肺炎嘅疫情打擊，重創本港嘅經濟，而政府推出多輪防疫抗疫基金後已經話財赤高企，又話冇第三輪保就業，預計會出現大批失業大軍，但政府密密開設常額職位，呢排議員都鬧爆出面炒人政府請人，已經做咗「攔路虎」，尋日路政署又話要開設職位，仲畀議員鬧爆係開設職位益自己友。
路政署擬增設6名首長級常設職位，嚟統籌新增嘅「易行城市管理處」轄下工程同其他維修護養工作，預料年薪同福利等開支約1,683萬元。立法會交通事務委員會尋日討論有關事宜，多名議員認為有關首長職位可以靠臨時編制職位代替，唔使常設，更有議員狠批政府喺經濟不景下，仍大規模開首長位，「政府連使錢落市民度都無錢，你哋仲使錢喺自己友身上？」
議員嘲「公務員升職先識做嘢」
議員葉劉淑儀質疑路政署加開首長職位只係為咗畀公務員可以升職，佢話「乜公務員要有得升職先識做嘢？」又指依家疫情嚴重，庫房出現赤字，喺市民生活艱難之際，政府話無錢花喺市民身上，但路政署竟然用大量公帑製造首長級職位，批評政府管理層領導能力不足，「有時高級反而唔識做嘢」。佢仲話路政署冇提供相關量化指標，難以確保加開職位後，各項地區工程可以加快推展。
促用臨時編制代替 節省成本
另一議員姚思榮就認為有關職位可以用臨時編制職位代替，因為一旦加開職位，以後就無法刪減，又質疑加開職位後係咪能夠節省成本同加快效率。
畀議員鬧爆，路政署署長陳派明就話明白有多項工程進度未符合市民預期，而嗰啲地區工程因為需求殷切而不斷增加，工作量大增，署方正計劃研究以組裝合成法、新工程合約加快效率，但仲死撐話嗰啲工作都屬於新工作，需要由首長級人員帶領，所以有必要加開職位喎。
話時話，依家喺事務委員會都鬧成咁，日後去到人事編制小組委員會申請開位都凍過水喇！
另外，委員會又通過建議，喺委員會轄下開設鐵路事宜、運輸業保險以及泊車位及泊車轉乘事宜小組，稍後會提交內務委員會審批，但一般嚟講，每個事務委員會只能夠有兩個小組委員會。議員謝偉俊建議將事項較多嘅鐵路事宜小組「分拆上市」，將小組升級成常設委員會；另一議員鄭松泰亦話鐵路事宜討論範圍廣，涉及多個政府部門，同意應增設恒常委員會討論。而委員會主席易志明就話會就呢項建議同運輸及房屋局討論，同埋要檢視議會守則相關規定等。