呢排好多學校爆發流感，政府嘅對策只有一招，就係叫學校停課。話說衞生署一星期兩次改停課指引，首先係署長陳漢儀話個別班級停3日，但隔幾日衞生防護中心總監黃加慶改為全校停課7日，點到校長同家長陀陀擰，有校長都忍唔住要炮轟衞生署訊息混亂又唔清晰。雖則衞生防護中心認衰，承認溝通不足，但事件反映衞生部門急就章，應對流感方寸大亂，尤其面臨冬季流感高峰期同新冠肺炎夾擊，令人質疑衞生部門係咪應付到？
