政情：再推三隧分流 陳帆賣口乖 議員唔收貨
立法會尋日繼續討論由議員陸頌雄提出，有關「紓緩道路交通擠塞」嘅無約束力議案，最終仲喺開會唔夠一個半小時內，以不記名方式舉手通過。期間陳帆主動提及自己感受，形容一連兩日出席會議，感覺議會變得實事求是，仲話即使議員有部分意見同政府唔同，都做到多元同埋互相包容。但點知讚完之後，就竟然送糖衣毒藥，重提連建制派議員都反對嘅三隧分流方案，話希望未來可以得到議員支持喎！
斥金鐘站擠塞如屍殺列車
其實會議中，陳帆都繼續被議員鬧爆，話一直對塞車問題束手無策。議員林健鋒提及，過往有網民將金鐘港鐵站嘅擠塞情況形容為「屍殺列車」，仲話如果帶埋餅乾上車，落車時會變成麵粉，建議政府官員應在交通繁忙時間到場體驗吓，隨時20分鐘亦未能上車。陳帆就回應話冇可能全日確保乘客有位坐，仲提番之前推行失敗嘅三隧分流方案，希望喺2023年政府收番西隧再重推方案時會得到支持。
話時話，政府喺上年年初推出三隧分流方案，點知就畀各黨派炮轟，仲喺臨提上立法會前夕就突然撤回，聲稱要參考中環灣仔繞道全面開通後嘅情況。點知唔夠兩個月又重推，但埋門一腳又再次撤回，當時就話因為不獲跨黨派支持。今次雖然議會得番少數反對派，會議相對比以前順暢，但始終都係關乎民生政策，難保可以輕易過到，陳帆真係要自求多福，唔好開心得太早喇！