政情：規範開會衣着表莊重 建制捉蟲

據悉，建制派尋日開會講吓未來路向，大家都係各自表述，而期間曾討論關於議會莊嚴嘅問題。按照議會傳統，當立法會主席進入會議廳時，議員理應要全體站立並鞠躬，但過往民主派明顯唔聽呢支笛，所以喺會上有人提出要收緊規範。

傳被逐議員須罰款停賽

對於有民主派早前將示威物品擺喺座位前，有人就建議議員日後喺討論相關議題先可以展示有關物品，趕絕泛民嘅「抗爭手段」。至於修改《議事規則》方面，聽聞建制派已有共識，為被逐離場嘅議員設立「罰款」同「停賽」罰則，相信係勢在必行，同時打算喺點算法定人數上作改動，會待時機成熟後再作公布。

針對規範衣着以表莊重，據悉，有人形容今次只係「撥亂反正」。但喺泛民總辭後，剩番建制派，而有個別建制派議員都着短袖衫、T恤或短褲開會，若果規管嘅話，咪即係玩埋自己友。

冇得「潮着」 謝偉俊贊成莊嚴

議事規則委員會主席謝偉俊都着過短褲返立法會，佢強調未曾喺大會上咁着，平時都係以西裝配搭短褲咁「潮着」。被問到驚唔驚日後嘅「穿着自由」受損，佢話自由都有底線，議會就好似法庭一樣咁莊嚴，絕對贊成建議，雖則《議事規則》有相關訂明，但一直冇好好守住條線咁話呀！

而陳恒鑌（Ben）、何俊賢同周浩鼎都着過T恤開會。阿Ben就話明白同事認為議會內嘅衣着表現鬆懈咗，雖然佢覺得尊重議會唔單止應注重衣着，但都認同衣着都可以起輔助嘅作用。對於佢曾經着T恤出入立法會，佢話議員着T恤加番件西裝外套，市民都可以接受嘅，但如果同事想重建議會莊重嘅衣着文化，就算要着西裝同打呔，佢都冇所謂喎。

話說前議員梁國雄（長毛）以前經常着T恤開會，但時任立法會主席認為長毛嘅衣着唔莊重同唔尊重議會，之後發出「不准穿圓領衫或T恤進行會議」嘅指引，議員衣着「犯規」就會被趕出議會。但喺第3屆立法會嘅議事規則委員會一致決定，議員衣着整齊乾淨出席會議就得，所以將相關衣着規定廢除。