中環出更：建制有分歧 明日大嶼通過存變數
立法會財務委員會即將審議涉款約5.5億元嘅「明日大嶼」計劃「中部水域人工島相關研究」，雖然外界認為建制會傾向支持，但由於政府無視民意硬推計劃，導致建制各板塊內部出現分歧。
睇番財會議程，喺6個涉及各部門開設職位嘅項目之後，就會審議明日大嶼。聽聞喺開設職位方面，較大機會通過嘅只有政制及內地事務局開設兩個編外職位，負責設立粵港澳大灣區發展辦公室，同埋財政司司長辦公室轄下嘅政府經濟顧問辦公室一個職位轉為常設。據悉，環境保護署開設9個首長級職位被議員質疑開設嘅必要性，最有可能「被撤回」，又縮減唔少時間，令緊接嘅明日大嶼將喺12月初，甚至更早就開始審議。
驚損公眾觀感 將失選票
因立法會延任而「翻生」嘅明日大嶼「殺到埋身」，各建制板塊內開始出現暗湧，有建制中人表明唔贊成、甚至反對計劃。有議員就抱怨話計劃會影響周邊環境，唔少市民對此不滿，驚支持計劃會引起公眾觀感問題，嚴重嘅話可能導致下屆選舉「甩票」；另有議員話新界囤積土地，唔明白政府點解唔用明日大嶼筆錢收新界啲地嚟起樓；亦都有議員話元朗部分地區啱啱開始發展，如果明日大嶼研究完要施工，眾多工程同時進行，屆時政府庫房會入不敷支。
民主派議員早前宣布總辭，雖然部分議員離任未生效，但已經唔出席任何會議。之不過，唔出席會議就唔代表放棄抗爭，反而民主派議員今日會召開記者會繼續反對明日大嶼。至於日後佢哋會用乜嘢方法喺議會外繼續發聲，就拭目以待喇！
卓妮