中環出更：憂過關程序麻煩 姚思榮唔去星洲旅遊
香港與新加坡「航空旅遊氣泡」將會過幾日後實行，旅客往來兩地毋須檢疫，熱愛旅遊嘅港人由疫情開始至今已大半年冇得出遊，終於等到「旅遊氣泡」啟動，即刻大受市民歡迎，有關航班火速爆滿。問番一眾議員有冇興趣把握機會去新加坡旅遊，點知個個都興趣不大嘞！就連旅遊界議員姚思榮都話擔心過關程序麻煩，暫時唔考慮咁話。
姚思榮話自己暫時冇咩興趣去，全因擔心過關程序仍然麻煩，仲話其實現階段去新加坡旅遊嘅港人相信較少，大多都係商務需要。但佢就認為政府用新加坡做試行都係不錯之選，如果今次做得好，未來肯定會有更大籌碼與內地洽談及實行健康碼，佢仲話真係好希望可以快啲有健康碼，大嘆之前有啲朋友、司機有急事返內地，經過隔離前後就冇咗一個月，實在係太麻煩。
邵家輝憂再有個案輸入
批發及零售界議員邵家輝就覺得新加坡旅遊氣泡對刺激本港經濟無實質效用，佢解釋話內地遊客消費佔本港零售業銷售額約三分一，新加坡佔好少比例，加上新加坡、韓國、日本等都仲有確診，覺得政府唔應該急於推行，坦言如果因此再有確診個案輸入，届時又再無限期延遲健康碼，就真係得不償失。
議員蔣麗芸都話無興趣，最大因素係人數有限，加上佢曾去過多次新加坡，現時議會時間又好緊張，所以暫時唔會去咁話。但未來如果推出日本北海道、泰國嘅旅遊氣泡，佢就會考慮啦，因為要去就去好凍或好熱嘅地方，別有一番滋味喎。
卓妮