政情：處理醫護罷工零進展 石禮謙轟政府太敷衍

回覆時僅稱醫管局會處理

立法會大會尋日朝早復會，因為泛民主派話總辭，所以冇泛民議員出席會議，原本提出呢條口頭質詢嘅李國麟都缺席，主席梁君彥着議員李慧琼代為提出質詢。

話說陳肇始回應議員嘅口頭質詢時，話醫管局部分員工今年2月初的工業行動極度不理想，唔符合病人利益，亦嚴重影響公立醫院服務，醫管局得悉約有7,000名員工參與行動，冇按時上班，上月初已就缺勤事件向有關員工發信，確認缺勤日期同了解原因，目前醫管局正整理相關回覆，如果發現有違反守則及條例，會按法律意見及機制處理。

促勿馬虎回覆「新的立法會」

顯然呢個回覆係完全冇進展，石禮謙發言時就批評政府回應太敷衍，更形容現時係「新的立法會」，官員回覆不能馬虎，要求當局回應如何處置有關員工。陳肇始回應指，醫管局發信是第一步，收回信件後要處理，強調醫管局一直嚴肅跟進，相信局方有機制防範將來再有同類事件發生及如何應對。

另一議員何俊賢就話有市民因持唔同政見，唔敢使用部分醫療機構服務，關注當局點樣加強市民對醫療系統嘅信心。陳肇始就話明白過去社會事件有好多唔同嘅消息，醫管局會加強內部管理同處理投訴，挽回市民對醫管局服務嘅信心。

陳肇始死撐服務逐步恢復

陳肇始又話呢次工業行動導致長期病患、新生嬰兒同癌症病人等，因醫院人手不足而受到唔同程度嘅影響，話政府喺較早前實行公私營合作計劃，加上部分人手已調配返回原有服務，醫管局喺7月份亦有聘請人手，認為積壓的延期服務已逐步恢復。

醫護人員喺2月罷工，事隔8個月，醫管局先有行動，仲只係詢問相關員工缺勤原因，到依家仲未有任何消息會唔會處分，政府同醫管局乜都拖字訣，難怪啲議員嬲爆喇！