中環出更：有機食品疫下創業 楊位醒：危機 大黃家和：有市場
香港有「美食天堂」之稱，港人一直對食品嘅要求好高，依家爆發新冠肺炎疫情，似乎更加喚醒市民對有機食品嘅關注，但呢類食品價錢始終比較昂貴，銷情係點嘅呢？
卓妮早前喺亞洲天然及有機博覽見到香港餐務管理協會會長楊位醒（醒哥），醒哥話疫情下茶餐廳只可勉強經營，低價賣緊20幾30蚊一個飯盒，皆因經濟唔好，失業率高企，市民一分一毫都同你計，依家主打有機同天然食品創業就好有危機喇！不過，佢絕對認同有機食品有發揮空間，特別喺年輕人嘅市場，可以建立全新嘅消費模式。
醒哥又講到中式酒樓經營非常艱難，原本主要靠晚市社團活動、百日宴同酒宴等，但奈何政府早前一直推行4人禁聚令，中國傳統唔鍾意「4」字，令到生意更加差，好彩依家放寬至6人聚會，「六六無窮」比較好，都多咗人擺酒。
有機食品唔係創業時機？原本有經營有機食品銷售嘅香港餐飲聯業協會會長黃家和（Simon）就唱反調喇，佢話喺2003年沙士嗰陣，市民已經開始關注食物安全同健康議題，重視有機食品，覺得食落肚都安心啲。到咗依家嘅疫情，隨住社會進步，健康食品選擇亦多咗變化，例如有人造肉同其他無激素嘅有機產品。
張偉雄反省飲食習慣
香港展覽會議業協會顧問張偉雄（Daniel）有份策劃今次展覽，話從中獲益良多，喺同各展覽商開會嗰陣，反省自己一直以嚟嘅飲食習慣相當唔健康，同時亦了解有機同天然食品嘅重要性。Daniel仲話原本覺得做運動已經足以保持身體健康，但依家都有所覺醒，決定喺屋企做起，減少食用油膩食品，甚至每星期搵一日食素，選用多啲健康食品，唔單止可以維持健康飲食，仲可以為綠色生活出一分力咁話。
卓妮