政情：張竹君出入法庭 遭市民野生捕獲
自年初疫情爆發至今，幾乎每日都要主持疫情記者會嘅衞生署衞生防護中心顧問醫生張竹君，堪稱係近期最具人氣嘅公職人員。尋日下晝雖然並無疫情記者會，但朝早張竹君就遭到市民「野生捕獲」，而地點就係高等法院門外。到底因乜嘢事，張要出入法庭呢？
獲邀合照及打氣
原來張竹君就一宗涉及醫學美容集團嘅誤殺案出庭作供，以交代衞生署喺案發之後嘅調查結果。雖然醫生習慣上係會提醒大家清潔雙手，不過張開始作供前，反而係法官先開口要求張以酒精搓手液清潔雙手。張作供約莫半個鐘就完結，正當張步出高院大樓時，有市民認得張嘅芳容，即刻趨前並提出合照嘅要求，而張亦十分之大方，企定定任由該位「捕獲」自己嘅市民，用手機影完合照先至移步離開。該市民亦得償所願，向張大呼「加油」。