中環出更：律師會斥張達明洩密 郭榮鏗死撐小事
香港大學法律學院首席講師、兼香港律師會理事張達明被爆洩密！香港律師會尋日去信張，指張喺未獲授權下兩次公開律師會內部文件，並於今年3月率先將律師會會員信件畀法律界議員郭榮鏗參閱。律師會表示喺今年5月獨立小組會議時，已通過對張達明嘅不信任動議。不過張否認洩密，而郭榮鏗更反指律師會為咗啲『雞毛蒜皮』嘅事大做文章添！
律師會形容事態嚴重，認為保密責任對律師專業至關重要，指張有失專業操守，而律師會理事定當嚴肅看待未經許可嘅披露行為，向全體會員通報有關情況係恰當嘅做法。
律師會信件供郭參閱
張達明就喺社交媒體回應事件，表示收到律師會嘅信函，佢承認今年3月率先向郭榮鏗披露一份律師會嘅文件，但否認係洩密，因為律師會當時稱會將文件一併交畀郭，佢只係唔肯定郭係咪已經收到文件啫，佢又形容律師會嘅指控內容缺乏分析同法律理據。
郭榮鏗指事件雞毛蒜皮得不值一提，批評律師會小題大做，反問張達明犯咗咩事，要律師會動用大量人力物力去處理，對律師會嘅做法表示極度遺憾，指自己出任法律界議員8年幾，認為律師會某啲人令佢好失望。郭又形容面對新冠肺炎疫情，大家應該思考點樣幫助法律界，但有人就係背後「搞小動作」。
卓妮