中環出更：歡迎捐物資 陳彩雲：收過6萬對鞋
常言道：「勿以善小而不為」，即使個人嘅力量非常微小，但當愈嚟愈多人願意付出，都可以幫到好多有需要嘅人。獅子總會第9分域主席陳彩雲參與社會服務好多年，期間見過某啲善長捐贈較為另類嘅物資，譬如曾經有位朋友送咗6萬對鞋畀佢做善事，然而佢都聯絡到有需要嘅家庭並將鞋送出，所以除咗捐錢之外，物資都可以好有用㗎！
話說國際獅子總會中國港澳303區最近展開飢餓服務「獅家飯Lions Move」，將飯盒同福袋送到各區派發畀獨居長者丶劏房戶同低收入家庭。而獅子會就有一位會員為響應善舉，捐咗8噸豬骨，而有份參與活動嘅「深水埗明哥」陳灼明，就將部分豬骨熬湯畀街坊飲。
陳雅輝着眼去偏遠地區派飯
講起捐物資，又唔係所有物件都適合，第8分域主席柯兆均就試過有人捐贈音響，鑑於唔係基層人士嘅必需品，所以柯惟有婉拒同解釋番畀捐贈者聽，並建議善長可以考慮改為購買飯券，以解決弱勢群體嘅溫飽問題。
而第3分域主席陳雅輝（Annie）指現時好多派飯服務都集中喺市區，所以佢哋就着眼於偏遠地區嘅老弱同基層社群。佢憶述有一次去一棟冇電梯嘅舊唐樓派飯，有位婆婆聽到敲門之後，要花成10分鐘先慢慢行到出嚟。婆婆話佢每日都會落街買餸，但就咁行出去附近嘅街市都需時半個鐘。Annie指唔少行動不便嘅人士要出門都好困難，因此派飯服務係有其重要性。
第7分域主席鄭嘉財指「獅家飯」的活動暫時為期75日，每日會派夠100個飯盒，至於福袋裏面嘅物品，就會按當區收集到嘅物資而定，所以唔同嘅分域，派發嘅福袋都係唔一樣㗎，正所謂積少成多，做善事最重要都係有冇心啫！
卓妮