政情：公民講場：郵政諗縮數 勢損服務質素

因應本年度錄得巨額虧損，香港郵政宣布一系列節流措施，包括「補鐘唔補水」，仲要過去唔使派信嘅員工亦要負責派埋一份。過去三年香港郵政已經冇聘請合約員工，依家仲有消息話未來五年都唔會增聘公務員職系郵差添，搞到內部人手本身嚴重不足。唔怪得有郵差擔心新安排影響郵政服務嘅質素，搞到啲前線員工士氣低落。近年郵件量下跌，再加埋同私人速遞公司嘅競爭，呢啲都係香港郵政迴避唔到嘅事實，作為香港郵政署長嘅朱曼鈴淨係識縮皮，不如諗下點樣開拓其他收入好過啦。