政情：方國珊選舉開支達260萬 西貢區會追擊
早前報名參選新界東立法會議員嘅西貢區議員方國珊，因申報嘅選舉開支高達260萬港元，引起大眾關注。繼早前有議員質疑佢有濫報之嫌，要求廉政公署徹查後，西貢區議會亦將此事納入議程，並將於明天大會中討論。方國珊重申自己跟足選舉程序申報，認為事件「多餘」。
方：毋須向佢哋交代
根據西貢區議會大會議程，顯示「本會亦遺憾方國珊涉嫌濫報選舉開支」為其中一項議員提出嘅動議，代表當日將會再次追擊呢件事。面對各方窮追猛打，方國珊就回應話，對方大鑼大鼓做咁多嘢，無非想透過攻擊佢，以鞏固選民對自己嘅支持度。方又話唔會就開支作詳細解釋，並重申每個候選人有各自嘅競選方法，認為自己毋須向佢哋交代，一切交由選舉事務處處理。又話佢哋現時一味炒作、抽水甚至譁眾取寵，係無任何意義可言，建議不如做實事，真正落區為市民服務。