中環出更：邀開會被拒 葵青區會轟陳肇始過門不入

政府早前喺冇諮詢下，先後徵用葵青區兩間酒店作等候檢測結果中心，引起當區居民不滿。葵青區議會前日下晝召開特別大會，打算跟進防疫設施選址同安排失當問題，但食物及衞生局同衞生署以正全力處理疫情為由，冇派員出席。之不過，有區議員發現食衞局局長陳肇始當日曾到訪葵興，但就去咗8分鐘步程外嘅葵青地區康健中心探訪，寸爆陳只係扮關心葵青區居民！區議員蔡雅文（文仔）喺Facebook（Fb）貼文，繼續鬧爆當局喺冇諮詢下徵用大窩口同青衣兩間鄰近民居嘅酒店，批評做法危害葵青區居民安全；又提到該區區議會曾邀請食衞局同衞生署派員出席特別大會，但唔成功。