中環出更：滙豐銅獅子重光 陳恒鑌：好兆頭即入市
滙豐銀行中環總行門口嘅一對獅子銅像，今年初被示威者破壞，近日終於重光，有小股東話自從銅像被破壞之後，都冇咩好消息，更加曾經跌穿2009年嘅「世紀供股價」28蚊，依家就似乎見到曙光喇。議員陳恒鑌（Ben）同樣認為銅獅重開係好兆頭，仲即刻入市以表支持添。
Ben話當時睇住東網直播，見到銅獅重見光明，認為低迷咗咁耐，終於迎接到好徵兆，於是靈機一觸決定買入滙控股票，以31蚊嘅價位入手，覺得都穩紮穩打，但都有身邊曾經損手嘅朋友，一聽到佢入市，都即刻耍手擰頭啊。Ben話希望好事接踵而來，期望滙控恢復派息，唔好再傷香港人嘅心，佢仲透露用咗6位數入市添，打算長揸，話留番畀個女做嫁妝都好啊，甚至留畀個孫都得，睇嚟佢真係未雨綢繆喇。
金融服務界議員張華峰（肥老闆）認為，滙控股價下跌，係由於當時冇派息。之不過，佢認為冇派息屬於政策上嘅問題，並唔代表真係冇錢派，事後滙豐都有擺多啲資源喺亞洲區喎。而銅獅重光之後，肥老闆趁個個都冇興趣嘅時候，自己都趁機執番啲，話長遠嚟講始終冇蝕底喎。
邵家輝：現金揸手亦係選擇
商界議員林健鋒（Jeffrey）都話有信心，仲話肥老闆買入價太貴添！佢話有信風水嘅市民見到銅獅被破壞，都會覺得唔好意頭，但依家銅獅重光，希望市民都會有番啲信心，而佢自己都同朋友買咗啲，亦都打算長揸咁話喎。
批發及零售界議員邵家輝講起滙控都有啲唏噓，話之前曾經損手而黯然離場，佢認同滙控作為藍籌股，股價波動比較穩定，但買賣股票難免要花時間睇實股市，同時覺得自己捉唔準時機。邵認為投資千萬要謹慎，雖然係老生常談但一定啱用，又或者喺兵荒馬亂嘅時候，揸番啲現金喺手都不失為一個選擇啊。
卓妮