政情：委員會主席位 泛民零的突破

建制否認甩轆 指早料失守

泛民喺前日大會拉布期間玩失蹤，被建制派突襲成功，但風水輪流轉，尋日就輪到建制派疑似甩轆！事關香園圍邊境管制站附屬法例小組委員會首次開會，建制派喺選主席階段只有兩人出席，議員石禮謙提名劉國勳出選，但點知冇第3名建制委員和議，令鄺俊宇喺無對手情況下自動當選。

鄺就話，建制同泛民事前並冇協調，相信建制派本身計劃盡取所有正副主席位置，估計今次係因為建制派甩轆。佢又話，唔知自己今次打開缺口後，建制會唔會容許泛民擔任其他委員會主席？

同屬該小組委員嘅建制派副班長陳克勤就否認甩轆，話喺報名時已知泛民有5人加入，而建制派只有4人，事前已經知爭唔到做主席。佢又話，附屬法例小組職能有限，而且設有最長7周嘅審議時限，故除非法案重要性較高，否則建制派唔會主動用人海策略嚟爭奪主席位囉。