政情：林卓廷翻容海恩舊帳 遭反斥良心狗肺
前議員陳淑莊拒絕延任立法會一年，並於新一立法年度展開前辭職。陳原為立法會政府帳目委員會委員，因其離職而出現空缺，該空缺喺尋日召開嘅內務委員會（內會）上進行選舉，最終新民黨容海恩擊敗公民黨楊岳橋出任。但選舉期間林卓廷就翻容海恩舊帳，不過就反而被斥良心狗肺。
梁繼昌建議辯論被拒絕
林卓廷提到，容早前喺電視節目中提及「各人有自己嘅良知」，又指帳委會工作沉重，議員嘅基本判斷力同良知都相當重要。容聽完隨即反擊，話有良知嘅人就唔會經常將良知掛口邊，但泛民最近喺立法會大會上點算法定人數達60次咁多，反問林嘅良知喺邊，更斥「我覺得你完全良心狗肺」。
另外，帳委會副主席梁繼昌提出，話希望容海恩同楊岳橋表達對帳委會嘅期望，又指主席石禮謙都同意呢個做法，惟石禮謙就話自己並無同意。而帳委會成員何俊賢同謝偉俊就不同意做辯論，認為無必要，何又指，相信市民好清楚容海恩甚至其他議員嘅人品同做事方式。
內會主席李慧琼最後未有容許兩人表達期望，指曾翻閱資料，過去冇一個相關嘅程序，又話議員任期已有4年，大家已相當熟悉，故決定不開先例。最終容海恩取得34票，擊敗僅獲18票嘅楊岳橋出任帳委會委員。