政情：勞顧會選舉泛民傾巢 建制派籲停止攬炒

鄧家彪：選戰空前混亂

代表工聯會出戰嘅九龍東總幹事鄧家彪話，自反修例事件以來，泛民主派成立好多新工會，而派人參選勞顧會選舉嘅政治意圖亦非常清晰，認為勞顧會嘅目的係爭取勞工權益，唔應該政治化。

爭取連任嘅鄧家彪形容今次選戰係空前混亂，話唔擔心就假，選情雖未至於岌岌可危，但丟失席位亦可能僅一步之差，今次競逐連任肯定無以前咁穩陣，所以要好認真咁計計數，話新工會湧現之下，要了解一下869個登記投票嘅工會當中，係新工會還是舊工會居多。鄧亦知道有傾向泛民嘅工會以往都唔出嚟投票，今次恐怕會被動員投票，無論如何都要加強宣傳同部署，拜訪唔同嘅工會以及勤力派傳單。

鄧家彪又批評資方喺勞顧會上，喺增加勞工假期至17日嘅事宜上拒絕談判，要求盡快將勞工假同銀行假睇齊、要求政府即刻推出失業或者停工現金津貼、為最低工資落實一年一檢等。鄧擔心勞顧會僱員代表一旦被泛民主導，會淪為現時區議會嘅情況，搞到開會次次拍枱、圍堵資方代表，又或者組織罷工行動，咁做只會正中商界嘅下懷，傾唔掂勞工權益，只會犧牲一班工人。

徐考澧：選舉唔志在贏

其中一位代表民主派出戰嘅香港酒店工會主席徐考澧話，參與今次選舉唔志在贏，只係希望凸顯選舉不公，認為選舉嘅「全票制」同「一會一票」嘅制度被建制派工會所把持，擺到明係小圈子選舉，令勞顧會長期被建制派操控，淪為被政府壓制勞工權益嘅工具。徐又話，唔掌握27個候選人當中有幾多係同路人，但會了解一下，希望藉此機會連結立場一致嘅工會代表。

預料今次參選勞顧會僱員代表嘅人數將會係歷來最多，選舉單位亦即工會數目同樣係最多。現屆勞顧會委員任期將於今年年底屆滿，換屆選舉將於11月21日舉行，選出5名僱員代表出任下屆委員，任期為兩年，至2022年12月31日。