中環出更：何君堯掌IT委員會 嘲泛民淨識嗌口號
立法會資訊科技及廣播事務委員會尋日舉行第3次會議選舉正副主席。儘管有11名民主派議員參選，但建制派唯一候選人何君堯最終取得21票當選主席，而副主席就要待下次會議選出。
會議由上屆主席，資訊科技界議員莫乃光主持。有出席會議嘅建制派議員認為，莫乃光容許民主派嘅參選人喺選舉論壇上發言攻擊建制派，做法有欠公允；亦有議員認為民主派對內地發展有針對性，擔心若由民主派議員出任主席，日後仲可唔可以帶隊去內地交流。
經民聯議員石禮謙表明支持何君堯出任主席，又話事務委員會係有規矩，即使民主鬥士亦會畀建制派議員發言，又讚何是一名律師、「好嘅皇仁仔」，相信何會做應該要做嘅事。但民主黨議員林卓廷疑挑起火頭，甚至形容支持何嘅議員係「福祿壽」。
倡港台新聞處加強兼容性
何君堯發言時曾指自己係建制派內嘅「小小華安」，其正直、操行同埋對香港嘅視野係比全部人高。何承認自己喺資訊科技方面有好多空間需要學習，又以環境事務委員會為例，話自己做事務委員會主席略有建樹，比空泛叫口號嘅人來得實在。何仲提到有部分議程係需要關注，例如香港電台同埋政府新聞處方面，認為依家兩個部門分別由唔同政策局負責，兼容性有需要加強。
卓妮