中環出更：登六同享 議員促政府 放寬乘車優惠
政府喺年初宣布，計劃放寬長者兩蚊乘車優惠嘅門檻，由現時嘅65歲降至60歲，但至今仍然未落實。當中有幾位議員即將步入可以享受優惠嘅年齡，都呼籲政府快啲搞掂，等佢哋多啲同朋友出去聚吓咁話喎。
金融界議員陳振英話佢間公司喺中環，平日收工都會同朋友去尖沙咀食飯，但因為過海容易塞車、尖沙咀路面又唔好行，反而就會選擇搭港鐵，仲話港鐵過海「快到飛起」添。另外，佢話香港唔單止有隱蔽青年，仲有一大班因為車費太貴，而唔願意出行嘅隱蔽老人，但政府一味話驚市民濫用，而未能推出優惠措施。有見及此，陳就希望政府可以推出實名制嘅個人八達通，限制一人只可以持有一張，倘若成功解決濫用問題，就可以從速推行，而佢同一班即將「登六」嘅同事都可以受惠喇！
梁美芬為減肥搭公共交通工具
身材愈嚟愈Fit嘅議員梁美芬（Priscilla）亦將於下年「登六」。Priscilla講到自從展開瘦身工程之後，不時都撇甩司機，食完晚飯就寧願搭港鐵先轉巴士，再要步行一段路先至返到屋企，若果政府下年如期落實措施，佢都可以直接得益。對於政府話放寬措施會導致經常性開支大增，Priscilla講起都有啲勞氣，話政府應該回報番一班喺嬰兒潮出世嘅長者，覺得可以循序漸進咁推行措施，例如優先惠及退休人士。
議員梁志祥（祥哥）就似乎已經蝕咗幾年喇！皆因佢今年62歲，話爭取有關措施長達8年，之不過佢係為大局着想，希望為一班老友記爭取福利，反而就好少為自己諗過，話就算政府放寬措施，佢都唔會專誠申請個人八達通，以獲取長者乘車優惠，因為祥哥鍾意揸車，好少搭公共交通工具咁話啊。祥哥又話內地好多地方，60歲或以上嘅長者已經可以享有免費門票，但自己都唔會特登申請喎。
卓妮